Este EP explora a transformación, o desexo e o movemento desde un universo onde conviven corpo, imaxe e son. Cunha proposta lingüística híbrida, co uso do galego, inglés e castelán, raze tende unha ponte entre o local e o internacional, e , constrúe unha paisaxe sonora onde a enerxía rave, a sensibilidade melódica e a experimentación conviven en tensión constante.
O CS A Nubeira de Vigo acollerá a festa de presentación, o sábado 30 de maio ás 20:00 h, e contará coa proxección do audiovisual ºoº, DJ sets e máis sorpresas.
Os adiantos “brumbrum” -carta de presentación visceral e industrial-, “mágiK” -mística e atmosférica, mesturando pop electrónico, percusión tribal e resonancias caribeñas- e “doze” -puro pulso de club en lingua galega-, xa permitiron descubrir distintas caras do imaxinario de raze e a ligazón á súa identidade raíz.
O EP complétase con “in.tu”, unha canción nacida entre Mykonos, Vigo e Madrid, sobre amor e desexo, abordada desde un prisma imaxinativo e esperanzador.
“11:12” é o peche emocional do EP, un tema de construción progresiva que viaxa desde o piano e a voz cara a unha explosión electrónica e coral luminosa.
raze investiga a tensión entre opostos —o orgánico e o electrónico, escuridade e luz, intimidade e provocación, levada ao directo nunha proposta escénica expandida onde o compoñente visual, o corpo e a experiencia inmersiva ocupan un papel central.
Entre as súas referencias conviven Arca, The Beatles, Rosalía, Caroline Polachek, Charli XCX ou SOPHIE, trazando unha proposta onde club, emoción e experimentación dialogan.
