Filloas presenta “a inesperada virtude da ignorancia”, un EP de pop electrónico en galego onde a enerxía do hyperpop convive con letras que abren gretas de reflexión sobre a vida contemporánea.
O universo estético de Filloas bebe de referencias como Matrix, Miyazaki, os videoxogos, o anime ou o K-pop, combinando imaxinario dixital, melancolía e un humor tan acedo como reconocible. Considerado pioneiro do hyperpop en galego, constrúe un son vibrante e acelerado: beats frenéticos, actitude festiva e unha mirada crítica cara aos ritmos impostos dun mundo que nunca se detén.
Este novo traballo reúne cancións que volven demostrar a súa capacidade para transformar a vulnerabilidade nunha experiencia colectiva: temas que invitan a saltar, cantar e pensar mentres bailas.
Os singles de adianto, “google calendar” —con videoclip de Xaime Miranda— e “chat gpt”, xunto ao arxentino Conan Kid, amosaban a faceta máis inmediata e bailable de Filloas.
Baixo as capas de sintetizadores, Filloas cuestiona a presión constante da hiperproductividade: “Pregunteime que lugar ocupa aí un rapaz coma min, que lle dá tanta importancia ás letras e só escribe desde ou vivido. Para que algo me pareza digno dunha canción, necesito darlle voltas… gústame construír narrativas a lume lento.”
Con portadas da ilustradora Uxía Nemiña, colaboradora habitual, “a inesperada virtude da ignorancia” é un exercicio de honestidade emocional: cotiandade e resignación con moito humor, conviven cunha clara vocación de baile e celebración.
Filloas consolídase así como unha das voces máis singulares da nova escena galega. Tras dous LPs e dous EPs publicados desde 2023, e o seu paso por múltiples festivais e salas, presenta agora seis novas cancións pensadas para o directo: unha experiencia sen pausa, onde o corpo se move mentres a cabeza non deixa de pensar.
Coa colaboración da Xunta de Galicia a través da Axencia Galega das Industrias Culturais.
