Eris Mackenzie publica “Laíño”, un traballo que combina creación propia e reinterpretación emocional de clásicos da música galega, reafirmando a súa identidade musical entre a tradición e a electrónica contemporánea.
O EP está composto por seis cancións. “Vivir na Coruña”, unha homenaxe á terra de orixe, e “Teño Saudade”, icónica composición de Andrés Do Barro, máis catro cancións orixinais que reflicten o universo sonoro do artista, no que conflúen influencias da electrónica máis pura —hardstyle, minimal e techno— cunha sensibilidade melódica moi persoal.
“Teño Saudade” é unha das pezas máis representativas da música galega contemporánea e un símbolo do espertar cultural de finais dos anos 60, nun contexto no que cantar en galego era tamén unha afirmación identitaria. A canción encapsula ese sentimento que transita entre a nostalxia, a melancolía e o vínculo coa terra e a memoria, tamén asociada á experiencia da emigración. Respectando a esencia melódica orixinal, fai unha relectura contemporánea que conecta pasado e presente, levando un clásico ao terreo da electrónica emocional.
“Vivir na Coruña” funciona como unha homenaxe directa. Eris Mackenzie transforma unha peza de carácter popular nunha evocación íntima, onde a cidade se converte en paisaxe de emocións sonoras. Reivindica o orgullo de orixe, e complementa a memoria colectiva xunto a “Teño Saudade”.
Con estas versións, o artista busca render tributo a dúas pezas fundamentais da música galega, mostrando o seu respecto e admiración por un legado que marcou a súa traxectoria persoal e artística. Estas influencias esténdense a figuras como Ana Kiro, Xil Ríos e Pucho Boedo, cuxos repertorios forman parte da banda sonora vital de Eris Mackenzie.
O EP “Laíño” representa unha declaración de intencións: tender pontes entre a memoria musical de Galicia e as correntes electrónicas actuais, xerando unha proposta única que conecta pasado e presente desde unha mirada contemporánea.
EP “Laíño” (ALENDE/Altafonte) producido por Eris Mackenzie xa dispoñible en todas as plataformas.
